డా వించి కోడ్

చిన్నప్పుడు నానమ్మ ఒక కథ చెబుతుండేది. ఉత్తముడెప్పుడూ పక్కవాళ్ళను చూసి నేర్చుకుంటాడు. అధముడు అన్నీ తప్పులు తనే చేసి గుణపాఠం నేర్చుకుంటాడు అని. మిగిలిన విషయాల సంగతి తెలీదు కానీ, ఖర్మ కాలి సినిమాల విషయంలో మాత్రం నేను తప్పకుండా రెండో వర్గానికే చెందుతాను. లోకమంతా కోడై కూసింది ఈ సినిమా ఏమీ బాగోలేదహో..అని. కాని కోడికూతలకు లేచే ఘటమేనా మనం? పొలోమంటూ ఇంతేసి మితృగణాన్ని వెంటేసుకొని వెళ్ళాను. ఏముంది. నా స్నేహితులెవ్వరికీ పుస్తకాలు చదివే అలవాటు లేదు. వాళ్ళు చక్కగా సినిమా ఎంజాయ్ చేశారు. నేను మాత్రం, తర్వాతేమవుతుందో ముందే తెలిసినా చెప్పలేకా, సినిమా పూర్తిగా ఎంజాయ్ చేయలేకా చిరాకుపడి వచ్చేశాను.
నేను "డా వించి కోడ్" చదివి కనీసం మూడు నెలలు కూడా కాలేదు. పుస్తకమంతా మెమొరీలో భద్రంగా ఉంది. అదీ చిక్కు. ఏ హారీ పాటరో, లార్డ్ ఆఫ్ ద రింగ్సో సినిమాకి వెళ్తే ఆ అనుభూతి వేరు. పుస్తకం నిండా అభూత కల్పనలెక్కువ కాబట్టి, మనం చదివినపుడు ఊహించుకున్నదీ, సినిమాలో ఎలా చిత్రీకరించారు అన్న కుతూహలం ఒకటుంటుంది. కానీ ఈ సినిమాలో ఏముంది? మొదటి సారి చదివినపుడూ/చూసినపుడూ తర్వాతేమవుతుందోనని కొంత ఆసక్తి ఉంటుంది. తర్వాత శుభం భవతి.. బ్లాగు పాఠకులకు ఉచితసలహా. మీరు ఆ పుస్తకం ఆల్రెడీ చదివి ఉంటే, సినిమాకు వెళ్ళక్ఖర్లేదు. (మీరూ నాలాగే రెండో వర్గానికి చెందితే నష్టమేమీ లేదు. వెల్‌కం టు ద క్లబ్.) ఇక సినిమా విషయానికి వస్తే, ఇంచుమించు నాకున్న అభిప్రాయమే కబుర్లు డాట్ కాం లో రాశారు. నేను ప్రత్యేకించి ఏమీ రాయబోవట్లేదు. కాని నన్ను పూర్తిగా నిరాశ పరచిన ఒక అంశమేమిటంటే, టాం హాంక్స్, ఆడ్రీ టాటూ ల నటన. డైలాగులు వల్లె వేసినట్టుండే డెలివరీ చూసి ఇతను టాం హాంక్సేనా అని విచారం కలిగింది. ఆడ్రీ టాటూ ను చూస్తుంటే ఇంకా అమేలీలోని పాత్ర ప్రభావం కనిపించింది. ఎనీవే డీవీడీ కోసం వెయిట్ చేయండి. లేదంటే మా రెండో వర్గపు క్లబ్బు ద్వారాలు మీకు ఎప్పుడూ స్వాగతం చెబుతాయి.